საქართველოს STEAM და რობოტიკის ჩემპიონატი 2026 წარმატებით დასრულდა
ყველა სტატია

საქართველოს STEAM და რობოტიკის ჩემპიონატი 2026 წარმატებით დასრულდა

შესავალი

2026 წლის 20 ივნისს, თბილისში, District 4-ის სივრცეში, საქართველოს რობოტიკის ასოციაციის (GRA) ორგანიზებით გაიმართა საქართველოს STEAM და რობოტიკის ჩემპიონატი 2026 — ერთდღიანი ტექნოლოგიური ფესტივალი, რომელმაც ერთ სივრცეში გააერთიანა მოსწავლეები, სტუდენტები, ახალგაზრდა ინჟინრები, საგანმანათლებლო დაწესებულებები, ტექნოლოგიური ორგანიზაციები და ინოვაციებით დაინტერესებული საზოგადოება.

ღონისძიებაში მონაწილეობდა 500-ზე მეტი მონაწილე და 50-ზე მეტი სკოლა, ხოლო დღის განმავლობაში ფესტივალს ათასობით სტუმარი ეწვია.

ჩემპიონატის მთავარი მიზანი იყო საქართველოში STEAM განათლების, რობოტიკის, ინჟინერიისა და პრაქტიკული ტექნოლოგიური სწავლების პოპულარიზაცია, ახალგაზრდებისთვის საკუთარი ცოდნისა და შესაძლებლობების წარმოჩენის სივრცის შექმნა და მათი საერთაშორისო შესაძლებლობებთან დაკავშირება.

ოთხი ძირითადი კონკურსი ერთ სივრცეში

ღონისძიების ფარგლებში პარალელურად გაიმართა რამდენიმე ჩემპიონატი და კონკურსი:

საქართველოს რობოტიკის ჩემპიონატი — SUMO და Line Follower კატეგორიებში

მონაწილე გუნდებმა საკუთარი რობოტები რეალურ კონკურენტულ გარემოში გამოცადეს. SUMO კატეგორიაში ავტონომიური რობოტები ერთმანეთს სპეციალურ არენაზე დაუპირისპირდნენ, ხოლო Line Follower-ის მონაწილეებმა საკუთარი რობოტების სისწრაფე, სიზუსტე და პროგრამული შესაძლებლობები გამოსცადეს.

სასკოლო რობოტიკის ჩემპიონატი

სხვადასხვა სკოლის მოსწავლეებმა მონაწილეობა მიიღეს პრაქტიკულ რობოტიკის გამოწვევებში, სადაც მნიშვნელოვანი იყო როგორც ტექნიკური ცოდნა, ისე პროგრამირება, ლოგიკური აზროვნება და პრობლემების გადაჭრის უნარი.

STEAM პროექტების კონკურსი

სასკოლო გუნდებმა საკუთარ სტენდებზე წარმოადგინეს მათ მიერ შექმნილი საინჟინრო და ტექნოლოგიური ნამუშევრები, ინოვაციური პროტოტიპები და STEAM პროექტები. ნამუშევრები შეაფასა სპეციალურად შერჩეულმა ჟიურიმ, რომელმაც სხვადასხვა კრიტერიუმის საფუძველზე გამოავლინა გამარჯვებული პროექტები.

RC მანქანების ჩემპიონატი

ღონისძიების კიდევ ერთი მნიშვნელოვანი ნაწილი იყო RC მანქანების შეჯიბრი, რომელმაც ტექნოლოგიურ პროგრამას დამატებითი დინამიკა და სანახაობრივი კომპონენტი შესძინა.

გამარჯვებულები და გზა ევროპის ჩემპიონატისკენ

ჩემპიონატის ფარგლებში გამოვლინდნენ და დაჯილდოვდნენ გამარჯვებული გუნდები სხვადასხვა კატეგორიაში.

განსაკუთრებით მნიშვნელოვანია, რომ SUMO და Line Follower კატეგორიებში გამარჯვებული სამი გუნდი საქართველოს სახელით ევროპის ჩემპიონატზე გაემგზავრება.

საქართველოს რობოტიკის ასოციაციისთვის ადგილობრივი ჩემპიონატები არა მხოლოდ შეჯიბრებებია, არამედ ახალგაზრდებისთვის საერთაშორისო ასპარეზზე გასვლის, გამოცდილების მიღებისა და საკუთარი საინჟინრო შესაძლებლობების წარმოჩენის მნიშვნელოვანი შესაძლებლობა.

საქართველოს რობოტიკის ასოციაცია მადლობას უხდის თითოეულ მოსწავლეს, მონაწილე გუნდს, სკოლას, მასწავლებელს, მენტორს, უნივერსიტეტს, ჟიურის წევრს, პარტნიორ ორგანიზაციას, მხარდამჭერს, მოხალისესა და სტუმარს, რომელმაც მონაწილეობა მიიღო ღონისძიებაში და ეს დღე განსაკუთრებული გახადა.

რა იყო ჩემპიონატზე

საქართველოს რობოტიკის ასოციაციის ორგანიზებით გამართულ ჩემპიონატზე მთელი დღის განმავლობაში სტუმრებს შეეძლოთ ენახათ და ჩართულიყვნენ მრავალფეროვან ტექნოლოგიურ აქტივობებში, დასწრებოდნენ ჩემპიონატებს, გაცნობოდნენ ინოვაციურ პროექტებს და საკუთარი ხელით გამოეცადათ სხვადასხვა ტექნოლოგია:

  • ტექნოლოგიური ვორქშოფები, მასტერკლასები და დემონსტრაციები;
  • დრონების საგამოფენო და საფრენი ზონა;
  • სამაგიდო თამაშების სივრცეები;
  • კიბერუსაფრთხოების აქტივობები, ქვიზები და ჰაკათონი;
  • პირველადი დახმარების სივრცე;
  • პარტნიორი კომპანიებისა და ორგანიზაციების სტენდები;
  • კვებისა და დასვენების სივრცე.

ჩემპიონატმა ერთ სივრცეში გააერთიანა 500-ზე მეტი მონაწილე, 50-ზე მეტი სკოლა, სტუდენტები, ახალგაზრდა ინჟინრები, უნივერსიტეტები, ტექნოლოგიური კომპანიები და ათასობით სტუმარი. ასოციაციის ყველა ჩემპიონატი წლების მიხედვით — GRA-ს ისტორიაში.

პარტნიორები

ჩემპიონატი საქართველოს რობოტიკის ასოციაციამ პარტნიორებთან ერთად გამართა: ილიას სახელმწიფო უნივერსიტეტი, IT Academy Step Georgia, RC კახა (Kakhas RC), სამაგიდო თამაშების გილდია, თამაშობანა, პირველადი დახმარების ცენტრი, სამეცნიერო კიბერუსაფრთხოების ასოციაცია და დრონების სკოლა.

დაწვრილებით თითოეულ შეჯიბრზე: SUMO და Line Follower, სასკოლო რობოტები, STEAM პროექტები, RC მანქანები.

ბლოგი

სხვა სტატიები

ყველა სტატია