საქართველოს რობოტიკის ნაკრები RoboChallenge 2026-ზე: როგორ დავეხმაროთ

2026 წლის 30 ოქტომბრიდან 2 ნოემბრამდე საქართველოს რობოტიკის ნაკრები პირველად მიიღებს მონაწილეობას RoboChallenge 2026-ზე — ევროპის ერთ-ერთ უდიდეს საერთაშორისო რობოტიკის ჩემპიონატზე, რომელიც ბუქარესტში (რუმინეთი) იმართება.

ნაკრებში საქართველოს რობოტიკის ასოციაციის (GRA) ეროვნული ჩემპიონატის სამი გამარჯვებული გუნდია. ისინი ქვეყანას სამ კატეგორიაში წარადგენენ:

• Mega Sumo — ავტონომიური სუმო რობოტები 3 კილოგრამამდე;
• Mini Sumo — პატარა, 500 გრამამდე სუმო რობოტები;
• Line Follower — ხაზზე მავალი რობოტები, რომლებიც ტრასას რაც შეიძლება სწრაფად გადიან.

ნაკრები სტუდენტურ და ოჯახურ გუნდებს აერთიანებს — ჯამში 12 მონაწილეს, რომლებიც საქართველოს ამ მასშტაბის საერთაშორისო ჩემპიონატზე პირველად წარადგენენ.

გზა ბუქარესტისკენ თბილისში დაიწყო. 2026 წლის 20 ივნისს GRA-ს ორგანიზებით გაიმართა საქართველოს STEAM და რობოტიკის ჩემპიონატი 2026, რომელმაც ერთ სივრცეში გააერთიანა სკოლის მოსწავლეები, სტუდენტები და ახალგაზრდა ინჟინრები მთელი ქვეყნიდან: 80-ზე მეტი გუნდი, 5000-ზე მეტი სტუმარი და სამი გამარჯვებული გუნდი, რომლებმაც ევროპის ჩემპიონატზე წასვლის უფლება მოიპოვეს (ჩემპიონატის ანგარიში: SUMO და Line Follower).

ასოციაციისთვის ადგილობრივი ჩემპიონატები სწორედ ამისთვისაა მნიშვნელოვანი: ახალგაზრდა ინჟინრებს საერთაშორისო სცენამდე მიჰყავს.

გაინტერესებთ, როგორ მუშაობს ეს რობოტები? წაიკითხეთ ჩვენი გზამკვლევები: როგორ ავაწყოთ სუმო რობოტი, ხაზზე მავალი რობოტის აწყობა და ხაზზე მავალი რობოტის წესები.

RoboChallenge ევროპის ერთ-ერთი ყველაზე მასშტაბური საერთაშორისო რობოტიკის ჩემპიონატია. 2026 წლის შეჯიბრი მისი მე-17 გამოცემაა და მსოფლიოს სხვადასხვა ქვეყნიდან ასობით გუნდს, ახალგაზრდა ინჟინერსა და რობოტიკის ენთუზიასტს აერთიანებს:

• 48 ქვეყანა;
• 326-ზე მეტი გუნდი;
• 1300-ზე მეტი მონაწილე;
• 483-ზე მეტი რობოტი.

ასეთ ჩემპიონატზე ჩვენი გუნდები საუკეთესო ევროპელ და მსოფლიო გუნდებს შეხვდებიან — ეს გამოცდილებაა, რომელსაც ისინი მერე საქართველოში დააბრუნებენ და სხვა ახალგაზრდებს გაუზიარებენ.

RoboChallenge-ის ორგანიზატორი გუნდების მგზავრობის, განთავსებისა და მომზადების ხარჯებს არ ფარავს. ნაკრების მონაწილეობისთვის საჭიროა 23 000 ლარი:

• ავიაბილეთები — გუნდების მგზავრობა ბუქარესტამდე და უკან;
• განთავსება — სასტუმრო ან საცხოვრებელი ბუქარესტში;
• რობოტების მომზადება — კომპონენტები, ტექნიკური განახლება და ტესტირება;
• ნაკრების ბრენდინგი — ფორმები, მასალები და მედია კონტენტი.

ნებისმიერი წვლილი მნიშვნელოვანია — როგორც მცირე დონაცია, ისე რობოტის ნაწილები ან მომსახურება.

1. დონაცია ონლაინ — ნებისმიერი თანხა შეგიძლიათ გადარიცხოთ პროექტის გვერდზე: საქართველოს რობოტიკის ნაკრები RoboChallenge 2026-ზე. იქვე ჩანს, რამდენი შეგროვდა და ვინ დაუდგა გუნდს გვერდში; დონაცია შეგიძლიათ ანონიმურადაც გააკეთოთ.
2. ნაწილები ან მომსახურება — თუ რობოტის ნაწილებით, მგზავრობით, განთავსებით ან სხვა მომსახურებით შეგიძლიათ დახმარება, მოგვწერეთ.
3. გააზიარეთ — ვერ ახერხებთ დახმარებას? გააზიარეთ ეს სტატია ან პროექტის გვერდი. ყოველი გაზიარება ნაკრებს ახალ მხარდამჭერთან აახლოებს.

კომპანიებისთვის. მხარდაჭერის ფორმატი მოქნილია: შეგიძლიათ სრულად დააფინანსოთ დარჩენილი თანხა ან დაფაროთ მისი ნაწილი. პარტნიორი კომპანია ნაკრების ოფიციალურ პარტნიორად იქნება წარმოდგენილი:

• ლოგო ნაკრების ფორმებზე, ბანერზე და საკომუნიკაციო მასალებზე;
• აღნიშვნა GRA-ს სოციალურ მედიაში — გუნდების წარდგენა, ვიდეოები ადგილიდან და შემაჯამებელი კონტენტი;
• ბრენდის დაკავშირება საქართველოს ნაკრების პირველ მონაწილეობასთან RoboChallenge 2026-ზე.

დაგვიკავშირდით: info@gra.ge · +995 551 08 04 04, ან საკონტაქტო გვერდიდან.

შეგროვება 29 ოქტომბრამდე გრძელდება, ჩემპიონატი კი 30 ოქტომბერს იწყება. გუნდების მომზადებას, ბუქარესტიდან კადრებსა და შედეგებს ასოციაციის ბლოგსა და სოციალურ ქსელებში გაგიზიარებთ.

ერთად გავგზავნოთ ქართული რობოტიკა ბუქარესტში!

• პროექტის გვერდი და დონაცია — RoboChallenge 2026;
• ასოციაციის საერთაშორისო საქმიანობა — საერთაშორისო;
• გინდათ, თქვენც მოხვდეთ ნაკრებში? დაიწყეთ აქედან: ჩემი პირველი რობოტი და შეჯიბრები.